الاثنين، 26 يناير 2009

كيف تعيش حياتك ؟



كيف تعيش حياتك ؟

اضغط على الصورة لرؤيتها بالحجم الطبيعي

للكاتب محمد شاهين

في الحقيقه معظمنا بيسال نفسه السؤال ده, يا ترى ازاي اعيش حياتي بطريقه طبيعيه يرضى بيها عن نفسه و يصبح من خلالها فرد "طبيعي" على حد مفهوم المجتمع لما هو طبيعي.

90% من اللي قروا السطر اللي فات فعلا مش عارفين يعيشوا حياتهم بشكل طبيعي بسبب منغص او اخر . عائق او اخر ..

شغلك متعب ,حياتك روتينيه, ولادك قرود مش بيسمعوا الكلام, مشغول دايما, او ابوك مسيطر على حياتك......الخ

بس اللي انا كاتب المقال ده عشانهم هما الناس اللي بتواجه عائق حقيقي ملموس لا يختلف عليه اتنين . هم اصحاب الاعاقه الحركيه اللي انا واحد منهم و الحمد لله ربنا انعم علي بالعلم و التجربه الكافيه اني اعرف اعيش حياتي بشكل مقبول من حيث تحديات الحركه و الاهم تحديات العقل و الفكر الانهزامي الاسود اللي اكيد زار كل واحد فينا و لو مره و عشش في دماغ ناس و صدقوني لا يوجد ما نخجل منه الاحساس بالياس طبيعي و هو طبيعه انسانيه و الا مكنوش سموه احساس , كانوا سموه زفت لو كان عيب.

العيب بقى انا يصبح الاحساس سيد تفكيرك و المتحكم في قراراتك و دي حاجه في ايدك, ربنا بيقول "لا يكلف الله نفسا الا وسعها" طبعا الكلام في الاول ممكن يترد عليه باساله كتير, يعني هو لازم ابقى قوي عشان ابقى موجود في الدنيا؟

لا العكس هو الصحيح انت مخلوق كده او ظروفك جت كده لانك اقوى الف مره من اللي حواليك و ربنا عارف ان الموضوع بالنسبه لك مش مستحيل و هاثبت لك صحه كلامي في مقالاتي ....لا بحاجه صغيره جدا , فاكر زمان و انت صغير قبل الاكتئاب و الحزن لما كنت لسه صغير بتشوف حد بيعل حاجه معينه زي غنى او تمثيل او عزف اله موسيقيه ؟ و كنت بتحس انك تقدر تعمل زيه بسهوله ؟ الاحساس ده مش اي كلام دي طاقه نفسيه جباره موجوده باخلك بالفطره و لو سيبتها تطلع فعلا هاتفاجيء نفسك بالنتائج بس تحديات الدنيا بتخلي الواحد ينساها و يركز على انه يعرف يعيش حياته الاول. ربنا اللي خلقك عارف انك جواك الطاقه دي و انا عارف ان جواك الطاقه دي عشان انا زيك حاسس باللي انت حاسس بيه. انت عايز تهيا لنفسك الظروف المناسبه بس و الطاقه دي هتطلع لوحدها.

الالم النفسي هو عدوك رقم واحد:

طبعا الواحد مننا ممكن يقعد في البيت ميخرجش سنه و مايضايقش لكن الفكر و الضيق بسببوا الم لا يحتمله بشر . حاسس ان الدنيا بتفوتك و انت قاعد تتفرج عليها. اصحابك رايحين جايين عملوا معرفش ايه النهارده و انت قاعد زي منتا لا شفت ولا جربت حاجه, قلقان عايز تشتغل قبل ما تحتاج لحد, فاكر ان عمرك ما هتتجوز او تلاقي شريك حياتك. و الله كلها احاسيس طبيعيه و عايز اقولك ان الناس كلها بتفكر في نفس المشاكل دي بس محدش بيقول.... انت بس اللي عندك الشجاعه انك تعبر عن تفكيرك و تواجه مخاوفك , لكن للاسف الاحاسيس دي معانا بتصبح قويه لانها متتاليه و حتميه و متتابعه.

متتاليه يعني ورا بعض و تقريبا بتيجي زي الكوكتيل كلها في وقت واحد لان المشاكل مترتبه على بعض , حتميه لان مفيش منها مفر هاتجيلك هاتجيلك و هتبقى لوحدك في خلالها لا حد زيك ولا حد حاسس بيك, ممكن الناس تتعاطف بس محدش فاهم بالظبط انت بتمر بايه و متتابعه يعني مفيش بين كل وجع و التاني تحسن او حاجه كويسه بتخليك تحسن انك من سيء الى اسوا و كل ده بيوجعك بسبب ان ليها نفس المنبع و السبب الا و هو اعاقتك يعني كينوتك يعني انت بمعنى اصح ... بس حاسب كل ده غلط انت مش وحش ولا ربنا بيكرهك انت بس عايز تلاقي طريقك الصح عشان تقدر تخدم نفسك و تعيش بشكل طبيعي في البيت و تشتغل و تحس بقيمه نفسك اللي هي كبيره اصلا في نظر الناس كلها لكن انت مش واخد بالك .....

بره في مدارس متخصصه لتعليم المعاقين و مساعدتهم انهم يعيشوا حياتهم بنفسهم لكن هنا للاسف لا يوجد توعيه ولا تعليم في الجهه دي , انا انتظرت سنين ان حد يعلمني او يقولي الصح عشان اعمله ملقتش و لقيت طريقي بنفسي فقررت اني انقل خبرتي و اللي اتعلمته لعل و عسى يوفقني الله في مساعده اخ او اخت لي في احتياج للنصيحه و ارجوا كل من يقرا كلماتي و عنده الخبره في تحديات الاعاقه نتعاون على الخير باذن الله.

في فيلسوف قال زمان انك لو لم تعترف بالمشكله لن تستطيع حلها .... راجل بيفهم لانك لو مش شايف سبب المشكله بجد مش هتعرف تحلها لانها مش هتبقى موجوده من الاساس ...لابسه طاقيه الاخفا و عماله تلطش فيك و مفيش حد يقدر يتعامل مع حاجه هو مش شايفها فلازم تعرف السبب ورا كل مشكله هتقابلك لو كنت عايز فعلا تحلها و انا عارف انك عايز تعمل كده.

عشان كده اول حاجه لازم تعملها انك تعترف انك معاق "ايوه انا مش فاكرك شايف الدنيا خضرة ولا انت عبيط انا عارف انك عارف انك معاق" انا اقصد لا تخجل في تسميه نفسك معاق او التحدث مع الناس عن اعاقتك لانها جزء منك و لازم اللي حواليك يتقبلوها . يعني مفيش حاجه اسمها رجليه بتوجعه ولا مبتعرفش تقف ولا ايدك ضعيفه....... لا انا معاق و الكلمه في حد ذاتها ليها معنى مش شتيمه يعني هناك شيء يعوقك عن فعل ما تريد و اذا كان هناك اعاقه فهناك حل لتخطيها و التغلب عليها يعني مش مستحيل و الا كانوا سموها استحاله ... الحجر في وسط الطريق اعاقه للسيارات فهل الحل المنطقي هو الوقوف وراء الحجر انظر للطريق المفتوح بعده؟ ولا افكر ازاي اشيله و اكمل طريقي؟ انا شايف انك تحاول تنزل من العربيه و تحاول تشيل الحجر و لو ماقدرتش تاجر لودر تشيله بيه . و انت ايه اخبارك؟ عايز تشيل الحجر الذي يعوق طريق حياتك؟

حاجه تانيه لازم تعرفها كويس, انك شئت ام ابيت محدود الحركه بشكل او باخرلازم تعرف حدودك في الحركه كويس و الحكايه دي هتساعدك انك تفكر ازاي هتقوم بالاعمال البسيطه مثال الغسيل او كنس الارضيه او حتى اعداد الطعام لنفسك و كل ذلك ساتطرق في مقالات قادمه باذن الله

تقبلوا تحياتي و اشوفكم على خير


شاهد ايضا:

حريه اتخاذ القرار

و اذا كان عندك اي استفسار او تود ان اطرح قضيه معينه تهمك اترك تعليق في مدونتي

http://allx1.blogspot.com/

او يسعدني ان تراسلني على ايميلي الخاص:

mohamad_shaheen@hotmail.com

محمد شاهين



ليست هناك تعليقات: